Оғози бунёди терминали нави байналмилалӣ дар фурудгоҳи Душанбе

Тибқи иттилои сомонаи расмии Президенти Ҷумҳурии Тоҷикистон, шоми 9 октябр, баъд аз бозгашт аз Туркманистон, Президенти Ҷумҳурии Тоҷикистон Эмомалӣ Раҳмон ҳамроҳ бо Раиси Маҷлиси миллӣ ва Раиси шаҳри Душанбе Рустами Эмомалӣ дар Фурудгоҳи Душанбе ба бунёди бинои терминали нави байналмилалӣ санги асос гузоштанд.

Зимни шиносоӣ бо лоиҳа гуфта шуд, ки иншоот бо риояи ҳамаи меъёрҳои муосири ҷаҳонӣ сохта мешавад. Иқтидори терминали нав барои хизматрасонӣ ба 8.5 миллион мусофир дар як сол пешбинӣ шудааст ва муҳлати сохтмон якуним сол муайян гардидааст.

Дар хабар таъкид мешавад, ки сохтмон бо истифода аз масолеҳи хушсифат ва ҷалби садҳо мутахассиси таҷрибадор анҷом меёбад. Ҳадаф аз бунёди иншооти нав таъмини сатҳи баланди қабул ва гусели мусофирон тибқи меъёрҳои байналмилалӣ ва анъанаҳои меҳмоннавозии тоҷикона мебошад.