Барномаи рушди парвариши павловния: дар ниҳолхонаҳо зиёда аз 120 ҳазор ниҳол парвариш мешавад

Ба иттилои АМИТ «Ховар», дар доираи «Барномаи рушди парвариши павловния дар Ҷумҳурии Тоҷикистон барои солҳои 2024-2028» ҳадаф гузошта шудааст, ки 200 гектар плантатсияҳои ин дарахт бунёд карда, чӯби корӣ, хӯроки чорво ва истеҳсоли асали молӣ таъмин шавад. Ҳамчунин гуфта мешавад, ки барнома ба ҳифзи заминҳои кишоварзӣ аз бодлесӣ ва беҳтар шудани вазъи экологии кишвар мусоидат мекунад. Ба гуфтаи Турдалӣ Арабов, сардори шуъбаи бунёд ва барқароркунии ҷангал ва ниҳолхонаҳои Агентии хоҷагии ҷангали назди Ҳукумати Ҷумҳурии Тоҷикистон, моҳи январи соли 2026 дар талу теппаҳои Лучоби шаҳри Душанбе 2100 бех ниҳоли яксолаи павловния бо сохтани хати террас ва низоми обёрии қатрагӣ шинонида шуд. Тибқи ин гузориш, баландии ниҳолҳо ҳоло аз 1 то 4 метр расида, нашъунамои онҳо хуб арзёбӣ мешавад. Дар гузориш инчунин зикр мешавад, ки павловния дар 7 то 8 сол ба ҳаҷми зиёди чӯб мерасад, аз реша бозмерӯяд ва дар кам кардани партовҳои газҳои гулхонаӣ, пешгирии гармшавии иқлим ва мутобиқшавӣ ба тағйирёбии иқлим нақш дорад. Ба гуфтаи ин масъул, қисми зиёди чӯби сохтмонии истифодашаванда дар Тоҷикистон воридотӣ аст ва густариши чунин плантатсияҳо метавонад ба сарфаи захираҳо ва таъсиси ҷойҳои нави корӣ мусоидат кунад.