Иштирок ва суханронӣ дар Мулоқоти ҳаштуми машваратии сарони давлатҳои Осиёи Марказӣ ва Ҷумҳурии Озарбойҷон

Эмомалӣ Раҳмон дар оғози сухан аз Президенти Туркманистон муҳтарам Сердар Бердимуҳамедов барои меҳмоннавозӣ ва ташкилоти хуби ҳамоиш сипосгузорӣ карда, Туркманистонро бо раёсати муваффақона дар Мулоқоти машваратии сарони давлатҳои Осиёи Марказӣ ва Озарбойҷон табрик гуфт. Дар суханронӣ ба зарфиятҳои бузурги Осиёи Марказӣ ва Озарбойҷон барои густариши ҳамкории иқтисодӣ, нақлиётӣ, энергетикӣ ва саноатӣ ишора шуд. Ҳамчунин, аҳамияти технологияҳои рақамӣ ва сабз, навоварӣ ва истифодаи зеҳни сунъӣ дар саноат таъкид гардид. Президенти Тоҷикистон пешниҳод намуд, ки рӯйхати лоиҳаҳои афзалиятноки энергетикӣ таҳия ва имкони маблағгузории муштараки онҳо баррасӣ карда шавад. Ӯ инчунин густариши ҳамкорӣ дар муқобили тағйирёбии иқлим, обшавии пиряхҳо, камшавии захираҳои об ва хокборишот, инчунин тақвияти ҳамкорӣ дар соҳаҳои амният, маориф, фарҳанг, сайёҳӣ, варзиш ва сиёсати ҷавононро муҳим шуморид.