Иштироки Эмомалӣ Раҳмон дар ҳамоиши роҳбарон оид ба гуногунии биологӣ

Сарвари давлат гуфт, ки Тоҷикистон барои ҳамоҳанг кардани афзалиятҳои миллӣ бо ҳадафҳои рушди устувор 25 қонун ва чанд санади муҳими стратегиро, аз ҷумла «Стратегияи миллии Ҷумҳурии Тоҷикистон оид ба ҳифз ва истифодаи оқилонаи гуногунии биологӣ то соли 2040» қабул кардааст. Ҳамчунин таъкид шуд, ки кишвар ба 11 конвенсияи байналмилалии муҳитзистӣ ҳамроҳ шудааст ва ба ҳифзи намудҳои нодири флора ва фауна аҳамияти доимӣ медиҳад.

Эмомалӣ Раҳмон тағйирёбии иқлим, таназзули муҳити табиӣ ва истифодаи ғайриоқилонаи заминро омилҳои таъсиргузор ба экосистемаҳо номид. Ӯ гуфт, ки ҳамоҳангии талошҳои байналмилалӣ дар соҳаҳои об, иқлим ва гуногунии биологӣ муҳимтар шудааст. Дар суханронӣ инчунин ба ташаббусҳои Тоҷикистон дар масъалаҳои об ва иқлим, Конфронси оби СММ дар Душанбе дар соли 2028 ва эълони соли 2025 ҳамчун Соли байналмилалии ҳифзи пиряхҳо ишора гардид.