Таъиноти кадрӣ дар сохторҳои давлатии Тоҷикистон

Имрӯз Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон кадрҳоеро, ки ба вазифаҳои муовини вазир дар вазоратҳои адлия, молия, рушди иқтисод ва савдо, маориф ва илм, инчунин дар кумитаҳои таҳсилоти ибтидоӣ ва миёнаи касбӣ, меъморӣ ва сохтмон, рушди сайёҳӣ, Агентии назорати давлатии энергетикии назди Президенти Ҷумҳурии Тоҷикистон, Агентии беҳдошти замин ва обёрӣ ва дигар мақомоти назди Ҳукумати Ҷумҳурии Тоҷикистон оид ба самти рақамикунонӣ таъин шудаанд, барои суҳбат ба ҳузур пазируфт.

Бо фармони Президенти Ҷумҳурии Тоҷикистон Сафарзода Анвар Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ таъин гардид. Дар мулоқот таъкид шуд, ки муовинон ва сарпарастони соҳаи рақамикунонӣ бояд дар муҳлатҳои кутоҳтарин барои ворид намудани технологияи муосир ва пайвастан ба низоми идораи электронии раванди кору истеҳсолот тадбирҳои мушаххас андешанд ва мутахассисони дорои таҷрибаи кор бо технологияи иттилоотӣ ва донандагони забонҳои хориҷиро ба кор ҷалб ва тарбия намоянд.

Ҳамчунин пешниҳодҳои Президенти Ҷумҳурии Тоҷикистон дар бораи бозхонд намудани баъзе шахсон аз вазифа ва узвияти Комиссияи марказии интихобот ва раъйпурсии Ҷумҳурии Тоҷикистон, инчунин пешниҳодҳо оид ба интихоб ва таъйини ҳайати нави ин комиссия ба Маҷлиси намояндагони Маҷлиси Олии Ҷумҳурии Тоҷикистон ирсол карда шуданд. Дар анҷом Сарвари давлат ба кадрҳои ба вазифаҳои пурмасъулият таъиншуда таъкид намуд, ки ба Ватан ва мардум содиқона хизмат кунанд ва бо шаҳрвандон муносибати шоиста дошта бошанд.