Форуми «CAPIF-5» дар Душанбе ба таҳкими пайвастагии рақамӣ ва рушди ҳамкории интернетии Осиёи Марказӣ бахшида шуд

Дар Душанбе Форуми Осиёи Марказӣ оид ба пиринг ва пайвастшавӣ (CAPIF-5) бо ҳамкории RIPE NCC, ҶСК «Тоҷиктелеком» ва бо дастгирии Хадамоти алоқаи назди Ҳукумати Ҷумҳурии Тоҷикистон баргузор гардид. Дар кори форум намояндагони ширкатҳои интернетӣ, операторон, нуқтаҳои мубодилаи трафик, мақомоти давлатӣ ва коршиносони технологияҳои иттилоотию коммуникатсионӣ аз кишварҳои Осиёи Марказӣ ва дигар минтақаҳо иштирок карданд.

Ба гуфтаи ташкилкунандагон, ҳадафи асосии форум таҳкими ҳамкории минтақавӣ дар соҳаи алоқа ва технологияҳои рақамӣ, рушди масирҳои мустақили интернетӣ, такмили пайвастагии шабакаҳо ва баррасии роҳҳои таъмини рушди устувори инфрасохтори рақамӣ дар кишварҳои Осиёи Марказӣ буд. Дар ин замина масъалаҳои RPKI, IPv6, модели IPv6-Mostly, самтҳои ҳаракати трафик ва ҳифзи шабакаҳо аз рабуда шудани масирҳои BGP низ мавриди баррасӣ қарор гирифтанд.

Сардори Хадамоти алоқаи назди Ҳукумати Ҷумҳурии Тоҷикистон Исфандиёри Саъдулло гуфт, ки Тоҷикистон дар солҳои охир барои рушди алоқа ва ICT ва таҳкими мавқеи худ дар фазои рақамии минтақа тадбирҳои пайваста амалӣ менамояд. Дар форум ҳамчунин ба аҳамияти диверсификатсияи манбаъҳои пайвастшавӣ ба интернет, беҳтар намудани сифати дастрасӣ ва рушди инфрасохтори муосир, аз ҷумла масирҳои рақамии минтақавӣ ва хатҳои нахи оптикии фаромарзӣ таъкид шуд.