Ба истифода додани неругоҳи офтобии 250 МВт дар ноҳияи Ашт

21 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи сафари корӣ ба шаҳру ноҳияҳои вилояти Суғд ба ноҳияи Ашт ташриф оварда, дар шаҳраки Шайдон неругоҳи офтобиро бо иқтидори 250 мегаватт мавриди истифода қарор доданд.

Тибқи иттилоъ, сохтмони неругоҳи фотоэлектрикии Ашт дар моҳи ноябри соли 2025 аз ҷониби ҷамъияти дорои масъулияти маҳдуди «Аён энерҷӣ» оғоз шуда, дар муҳлати кӯтоҳ ба анҷом расид. Неругоҳ дар масоҳати 793 гектар бунёд гардида, иқтидори пурраи он 250 мегаватт мебошад. Ҳамчунин хатти ҳавоии дузанҷираи 220 киловолта ба дарозии 9.8 километр то зеристгоҳи 220/110/6 киловолтаи Ашт сохта шуда, 36 поя насб гардид.

Дар гузориш гуфта мешавад, ки бо ба истифода додани ин иншоот 50 мутахассиси маҳаллӣ бо кори доимӣ таъмин шуданд. Мақомот таъкид карданд, ки неругоҳ ба афзоиши истеҳсоли барқ дар вилояти Суғд мусоидат карда, 40 фоизи талаботи вилоятро бо неруи барқ таъмин хоҳад кард. Ҳамзамон барои соли 2027 бунёди иловагии неругоҳҳои фотоэлектрикӣ бо иқтидори 700 мегаватт ва истифодаи дастгоҳҳои захиракунандаи энергия дар вилояти Суғд тавсия дода шуд.