Форуми байналмилалии «Сайёҳии устувор ва мероси фарҳангӣ» иқтидори сайёҳӣ ва фарҳангии Тоҷикистонро муаррифӣ менамояд

Дар доираи таҷлили ҷашни бостонии Меҳргон, ки яке аз ҷашнҳои миллии тоҷикон ва унсури мероси фарҳангии ғайримоддии башарият ба шумор меравад ва ба Феҳристи мероси фарҳанги ғайримоддии ЮНЕСКО ворид шудааст, имрӯз дар Донишгоҳи байналмилалии сайёҳӣ ва соҳибкории Тоҷикистон Форуми байналмилалии «Сайёҳии устувор ва мероси фарҳангӣ» оғоз гардид.

Дар хабар гуфта мешавад, ки рушди сайёҳӣ ва ҳифзи мероси фарҳангӣ дар меҳвари таваҷҷуҳи Ҳукумати Тоҷикистон қарор дорад. Таъкид шудааст, ки сайёҳӣ яке аз соҳаҳои афзалиятноки иқтисоди миллӣ буда, ба фароҳам овардани ҷойҳои нави кор, баланд бардоштани сатҳи иҷтимоии аҳолӣ ва муаррифии иқтидори сайёҳии кишвар мусоидат мекунад.