Эмомалӣ Раҳмон Ли Сянро ба ҳузур пазируфтанд

Дар оғози мулоқот Эмомалӣ Раҳмон таъкид карданд, ки Тоҷикистон ба таҳкиму тавсеаи ҳамкорӣ бо Ҷумҳурии Мардумии Чин аҳамияти хос медиҳад. Ли Сян гуфт, ки Чин пайваста аз рушди Тоҷикистон дастгирӣ мекунад ва дар татбиқи лоиҳаҳои афзалиятноки муштарак мусоидат менамояд.

Дар суҳбат густариши ҳамкории иқтисодӣ, аз ҷумла гардиши савдо, ки дар моҳҳои январ-августи соли равон ба зиёда аз 2.5 миллиард доллар расидааст, баррасӣ шуд. Ҳамчунин татбиқи лоиҳаҳои нави муштараки судманд дар соҳаҳои саноат, энергетика, нақлиёт, инфрасохтор ва кишоварзӣ, истифодаи технологияҳои муосир, аз ҷумла зеҳни сунъӣ, таъсиси ҷойҳои нави корӣ ва омодасозии кадрҳо мавриди таваҷҷуҳ қарор гирифт.