Дар Душанбе конференсияи байналмилалӣ оид ба рушди илм ва истеҳсолоти кишоварзӣ баргузор шуд

Имрӯз дар шаҳри Душанбе таҳти унвони «Усулҳои инноватсионии рушди илм ва истеҳсолоти кишоварзӣ дар шароити тағйирёбии иқлим» бо иштироки муовини Сарвазири Ҷумҳурии Тоҷикистон Сулаймон Зиёзода ва олимону коршиносон аз ҷумҳуриҳои Узбекистон, Озарбойҷон, Қирғизистон, Чин ва Русия конференсияи байналмилалии илмӣ-амалӣ баргузор гардид.

Пеш аз оғози ҳамоиш намоиши маҳсулоти кишоварзӣ доир шуд. Ҳадафи асосии чорабинӣ баррасии масъалаҳои рушди илм ва истеҳсолоти кишоварзӣ дар шароити тағйирёбии иқлим, истифодаи усулҳои инноватсионӣ, муайян кардани роҳҳои самараноки татбиқи дастовардҳои илмӣ дар истеҳсолот ва густариши ҳамкории байналмилалӣ буд.

Дар ҷараёни нишаст масъалаҳои селексия ва тухмипарварӣ, ҳифзи растаниҳо, истифодаи самараноки замину об ва рақамикунонии соҳаи кишоварзӣ низ мавриди баррасӣ қарор гирифтанд.