Дар ноҳияи Бобоҷон Ғафуров ду зеристгоҳи барқӣ ба истифода дода шуд

Тибқи иттилои АМИТ «Ховар» бо истинод ба хадамоти матбуоти Раиси вилояти Суғд, дар ноҳияи Бобоҷон Ғафуров ду зеристгоҳи барқӣ ба истифода дода шуданд. Ин иқдом барои сабук кардани сарбории шабака ва беҳтар кардани сифати интиқоли неруи барқ пешбинӣ шудааст.

Зеристгоҳи «Арбоб» бо шиддати 110/35/6 киловолт дар ҳудуди Ҷамоати деҳоти Унҷӣ бунёд гардида, ба кам шудани сарбории зеристгоҳҳои Рӯмон, Унҷӣ, Ленинобод ва Ситора мусоидат мекунад. Барои иншоот хати интиқоли барқ ба масофаи 12 километр кашида шуда, таҷҳизоти муосир насб шудааст.

Ба гуфтаи мутахассисон, ба истифода додани он имкон медиҳад, ки талафоти неруи барқ аз 16 то 7 фоиз коҳиш ёбад ва шиддати шабака то 220 волт расонда шавад. Ҳамзамон, ин зеристгоҳ метавонад хатари садамаҳои шабакаи барқиро дар фасли сармо кам кунад.