Намояндагони Академияи миллии илмҳои Тоҷикистон дар ҷаласаи Шурои мудирони Маркази байналмилалии илмию техникӣ дар Ереван иштирок карданд

ДУШАНБЕ, 2026-10-24 /АМИТ «Ховар»/. 2026-10-21 то 2026-10-22 дар шаҳри Еревани Арманистон ҷаласаи 83-юми Шурои мудирони Маркази байналмилалии илмию техникӣ баргузор шуд, ки дар он намояндагони Академияи миллии илмҳои Тоҷикистон иштирок намуданд.

Тавре АМИТ «Ховар» бо истинод ба Академияи миллии илмҳо хабар медиҳад, дар ҷаласа татбиқи харитаи роҳи стратегӣ ва афзалияти Маркази байналмилалии илмию техникӣ барои соли 2027, иҷрои буҷети соли 2026, буҷет ва саҳмгузории давлатҳо барои соли 2027, дурнамои молиявии соли 2028 ва дигар масъалаҳо баррасӣ шуданд. Иштирокдорон инчунин рафти иҷрои лоиҳаҳо ва натиҷаҳои арзёбии пешниҳодҳои озмуни кушодаи соли 2026-ро муҳокима карданд.

Дар ҷаласа ноиби президенти Академияи миллии илмҳои Тоҷикистон Саидмуқим Ибодзода аҳамияти ҳамкории Тоҷикистон бо Маркази байналмилалии илмию техникиро таъкид намуд. Дар доираи ҷаласа вохӯриҳои ӯ бо роҳбарият ва масъулони дафтари марказии марказ, инчунин бо намояндагони муассисаҳои илмии Қазоқистон, Қирғизистон, Гурҷистон, Арманистон, ИМА ва Иттиҳоди Аврупо баргузор гардиданд.