Ҳиссаи Хатлон дар ҳаҷми умумии маҳсулоти кишоварзии Тоҷикистон беш аз 53 фоизро ташкил медиҳад

ДУШАНБЕ, 2026-10-22 /АМИТ «Ховар»/. Тибқи маълумоти хадамоти матбуоти Раиси вилояти Хатлон, кишоварзони вилоят саҳми асосиро дар афзоиши истеҳсоли маҳсулоти кишоварзии кишвар гузоштаанд. Ҳаҷми умумии истеҳсоли маҳсулоти кишоварзии Тоҷикистон ба 35.7 миллиард сомонӣ расид.

Дар ин давра дар ҳамаи шаклҳои хоҷагидории вилояти Хатлон нишондиҳандаҳои муҳими истеҳсолӣ ба қайд гирифта шуданд. Аз ҷумла, беш аз 864.2 ҳазор тонна ғалладона, 224 ҳазор тонна картошка, 1.8 миллион тонна сабзавот, 945.6 ҳазор тонна маҳсулоти полезӣ, 378.1 ҳазор тонна мева ва 133 ҳазор тонна ангур ҷамъоварӣ шудааст.

Дар бахши чорводорӣ низ афзоиш сабт гардида, истеҳсоли гӯшт ба 138.8 ҳазор тонна, шир ба 345 ҳазор тонна ва тухм ба 137.6 миллион дона расид. Барои таъмини соҳа 1.4207 миллион тонна хӯроки дурушт ва 22.3 ҳазор тонна хӯроки ширадор захира шудааст.