Ба таври фосилавӣ ба истифода додани 20 иншоот ва 70 километр роҳҳои маҳаллӣ дар ноҳияи Восеъ

Дар ноҳияи Восеъи вилояти Хатлон Президенти Ҷумҳурии Тоҷикистон Эмомалӣ Раҳмон 20 иншооти таъиноташон гуногунро ба таври фосилавӣ ба истифода доданд. Ба онҳо 3 муассисаи таҳсилоти миёнаи умумӣ, 1 кӯдакистон, 9 маркази инкишофи барвақтии кӯдакон, бинои маъмурии Корхонаи давлатии фаръии оби нӯшокӣ ва рафъи обҳои партов, марказҳои хизматрасонӣ ва забономӯзӣ, бинои маъмурии шуъбаи Вазорати корҳои дохилӣ дар деҳоти Миралиобод, корхонаи парандапарварӣ барои 60 ҳазор сар паранда ва истеҳсоли гӯшти мурғ, ду корхонаи хиштбарорӣ ва 70 километр роҳи мумфаршгардидаи маҳаллӣ дохил мешаванд.

Ҳамзамон як қатор иншооти соҳаи маориф, аз ҷумла бинои иловагӣ назди МТМУ №13 дар деҳоти Бобошоҳиён, МТМУ №42 дар деҳоти Худоёр Раҷабов ва МТМУ №76 дар деҳаи Навдеҳ, инчунин кӯдакистон дар деҳаи Тосқалъа ва 9 маркази инкишофи барвақтии кӯдакон ба истифода дода шуданд. Дар натиҷа барои сокинони ноҳия ҷойҳои нави корӣ ва шароити беҳтари таълим фароҳам шуд.