Ифтитоҳи бинои раёсати маорифи ноҳияи Рӯдакӣ

Тибқи иттилои сомонаи расмии Президенти Ҷумҳурии Тоҷикистон, 19 октябр Президенти Ҷумҳурии Тоҷикистон Эмомалӣ Раҳмон бо мақсади шиносоӣ бо вазъи иқтисодию иҷтимоӣ, ифтитоҳи як қатор иншооти нав ва мулоқоту суҳбат бо сокинон ба ноҳияи Рӯдакӣ ташриф оварданд.

Дар ин сафар бинои нави раёсати маорифи ноҳияи Рӯдакӣ ба истифода дода шуд. Иншоот дар доираи тадбирҳои созандагӣ ба истиқболи 35-солагии Истиқлоли давлатии Ҷумҳурии Тоҷикистон бунёд гардида, аз 35 ҳуҷраи корӣ, маҷлисгоҳ бо 182 ҷойи нишаст, китобхона, ошхона ва меҳмонхона иборат мебошад.

Дар гузориш таъкид мешавад, ки барои фаъолияти самараноки кормандон тамоми шароити зарурӣ ва имкониятҳои муосир фароҳам оварда шудааст. Ин иқдом ба таҳкими инфрасохтори соҳаи маориф ва беҳтар гардидани сифати таълиму тарбия мусоидат мекунад.