Лоиҳаи Қонуни Ҷумҳурии Тоҷикистон «Дар бораи бостоншиносӣ» баррасӣ гардид

Дар Агентии ҳифзи мероси таърихию фарҳангии назди Ҳукумати Ҷумҳурии Тоҷикистон ҷаласа доир гардид, ки дар он лоиҳаи Қонуни Ҷумҳурии Тоҷикистон «Дар бораи бостоншиносӣ» баррасӣ шуд. Ба иттилои агентӣ, иштирокдорон такмили матни ниҳоии қонун ва беҳтар кардани мазмуну муҳтавои онро муҳокима карданд.

Директори Агентӣ Шералӣ Хоҷазода гуфт, ки дар шароити ҷаҳонишавӣ мероси таърихию бостонӣ ва фарҳангӣ ба яке аз рукнҳои асосии ҳифзи арзишҳои миллӣ табдил ёфтааст. Дар ҷаласа таъкид шуд, ки бо вуҷуди он ки зиёда аз 70 фоизи ёдгориҳои таърихию фарҳангии кишварро ёдгориҳои бостонӣ ташкил медиҳанд, дар Тоҷикистон то ҳол қонуни соҳавии бостоншиносӣ мавҷуд нест.

Ёдовар шуданд, ки супориш барои таҳияи ин лоиҳа дар Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олӣ оид ба «самтҳои асосии сиёсати дохилӣ ва хориҷии ҷумҳурӣ» 2025-12-16 дода шуда буд.