Ба истифода додани марказҳои обтаъминкунӣ ва корез дар шаҳри Кӯлоб

Иншоот барои беҳтар кардани таъминоти аҳолӣ бо оби тозаи ошомиданӣ ва рушди инфрасохтори коммуналии шаҳри Кӯлоб сохта шудаанд. Ба Пешвои миллат иттилоъ дода шуд, ки марказҳои нав бо таҷҳизоти зарурӣ таъмин буда, барои қабул, захира ва интиқоли об ба маҳаллаҳои аҳолинишин пешбинӣ шудаанд.

Дар деҳаи Корез маркази обтаъминкунӣ бо ҳавзи захиравӣ, истгоҳи обкашӣ ва дигар иншооти ёрирасон ба истифода дода шуд. Дар деҳаи Валиҷон Шамсов маркази обтаъминкунӣ ва корез оғоз гардид ва дар деҳаи Тӯдакафш низ чунин марказ ба истифода супурда шуд. Баъд аз ба истифода додани иншооти нав 30 нафар бо кор таъмин шуданд.

Эмомалӣ Раҳмон ба масъулин дастур доданд, ки фаъолияти муназзами марказҳои нав таъмин гардида, таҷҳизоту шабакаҳо дар ҳолати хуб нигоҳ дошта шаванд. Ҳамчунин ба сифати хизматрасонӣ, истифодаи оқилонаи захираҳои об ва риояи талаботи санитарӣ диққати ҷиддӣ дода шавад.