Эмомалӣ Раҳмон дар ноҳияи Рашт Мактаби президентӣ барои хонандагони болаёқатро ба истифода доданд

Душанбе, 11 September 2026 / АМИТ «Ховар» хабар медиҳад, ки Мактаби президентӣ барои хонандагони болаёқат дар ноҳияи Рашт ба истифода дода шуд.

Тибқи хабар, бинои нави таълимӣ аз 33 синфхонаи муҷаҳҳаз иборат буда, барои 800 хонандаи болаёқат пешбинӣ шудааст. Дар муассиса синфхонаҳои компютерӣ бо пайвастшавӣ ба интернет, озмоишгоҳҳои химия, биология ва физика, инчунин синфхонаҳои таълими меҳнат ва омодагии ибтидоии ҳарбӣ ҷойгир шудаанд.

Ҳамчунин толори маҷлис бо 400 ҷойи нишаст, ошхона, толори варзиш, майдончаи варзишӣ ва ду хобгоҳи алоҳида барои духтарон ва писарон бо иқтидори умумии 350 нафар бунёд шудааст. Ба иттилои хабар, бо ба кор даромадани ин муассиса зиёда аз 60 омӯзгор соҳиби ҷойи кор шуданд.