Мулоқот бо Ноиби Президенти Бонки аврупоии таҷдид ва рушд Маттео Патроне

27 октябр дар шаҳри Душанбе Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Ноиби Президенти Бонки аврупоии таҷдид ва рушд Маттео Патроне мулоқот намуданд.

Дар суҳбат ҳолати кунунӣ ва дурнамои ҳамкории Тоҷикистон бо Бонк, рафти татбиқи лоиҳаҳои муштарак ва имкониятҳои густариши сармоягузорӣ баррасӣ гардид. Сарвари давлат Бонкро яке аз шарикони муҳими Тоҷикистон дар рушди иқтисод, инфрасохтор ва бахши хусусӣ арзёбӣ намуда, барои ҳамкории судманд изҳори сипос карданд.

Таъкид шуд, ки ҳамкорӣ аз соли 1993 идома дорад, шумораи лоиҳаҳо дар Тоҷикистон ба 201 ва ҳаҷми умумии сармоягузорӣ ба беш аз 1.1 миллиард евро расидааст. Ҳамчунин аҳамияти Ёддошти тафоҳум оид ба Харитаи роҳи стратегии бисёрсолаи сармоягузорӣ барои солҳои 2026-2030 ба маблағи 900 миллион доллар зикр гардид. Дар мулоқот масъалаҳои «энергетикаи сабз», сохтмони неругоҳҳои офтобӣ, навсозии шабакаҳои барқ, коҳиши талафоти неру, беҳтар намудани таъминоти оби тоза, низомҳои корезу обёрӣ, ҳамкорӣ дар маориф ва рақамикунонӣ баррасӣ шуданд.