Президенти Тоҷикистон: Дар 25 соли охир ба рушди иқтисоди мамлакат 760 миллиард сомонӣ сармоя равона гардидааст

Президенти Ҷумҳурии Тоҷикистон имрӯз дар мулоқот бо соҳибкорону сармоягузорони мамлакат гуфт, ки ин маблағҳо барои бунёди неругоҳҳо ва хатҳои интиқоли барқ, роҳҳо, пулҳо ва нақбҳо, корхонаҳои саноатӣ ва иншооти иҷтимоӣ истифода шудаанд.

Ӯ таъкид кард, ки ҷалби сармояи дохилӣ ва хориҷӣ бояд ба таъсиси иқтидори нави истеҳсолӣ, ҷойҳои нави корӣ ва рушди инфрасохтор мусоидат кунад. Ҳамчунин зарур аст, ки Қонуни Ҷумҳурии Тоҷикистон «Дар бораи сармоя ва ҳавасмандгардонии фаъолияти сармоягузорӣ» ва «Стратегияи ҷалби сармоя барои давраи то соли 2040» пурра татбиқ шаванд.