Табрикоти Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба муносибати Рӯзи забони давлатии Ҷумҳурии Тоҷикистон

Ҳамватанони азиз, сокинони фарҳангдӯсти пойтахт! Ҳар сол санаи 5 октябр дар кишвари маҳбубамон ҳамчун Рӯзи забони давлатии Ҷумҳурии Тоҷикистон бо шукуҳи хоса ҷашн гирифта мешавад. Ба ин муносибати фархунда ҳамаи шуморо самимона муборакбод мегӯям. Дар паём таъкид мешавад, ки ба шарофати сиёсати оқилона ва фарҳангпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон забони тоҷикӣ мақоми худро ҳамчун яке аз куҳантарин ва зеботарин забонҳои ҷаҳон устувор карда, ба омили асосии ваҳдати саросарӣ, шиносномаи ҳастӣ ва ганҷинаи бебаҳои маънавии миллат табдил ёфтааст. Ҳамчунин дар солҳои соҳибистиқлолӣ барои таҳкими пояҳои ҳуқуқии истифодаи забони давлатӣ ва ҳифзи покии забони адабӣ ташаббусҳои муҳим амалӣ шудаанд. Дар анҷом ба ҳамаи ҳамдиёрон ва ҳамватанони бурунмарзиамон саломатӣ, осудагӣ, хушбахтӣ ва комёбиҳо дар роҳи ҳифз ва рушди забони модарӣ таманно шудааст.