Барномаи давлатии кабудизоркунӣ. Дар татбиқи босамари он саҳми назаррас гузорем

Дар ҷаласаи корӣ 15 октябр бо иштироки масъулини соҳа муовини Сарвазири Ҷумҳурии Тоҷикистон Сулаймон Зиёзода гуфт, ҳангоми интихоби ниҳол барои корҳои кабудизоркунӣ бештар ба навъҳои маҳаллии ба хоку иқлими ҳамон минтақа мутобиқ бартарӣ дода шавад. Ӯ ҳамчунин ҷиҳати таъмини нигоҳдорӣ ва сабзиши ниҳолҳои шинонидашуда андешидани тадбирҳои муҳимро зарур шуморид.

Тибқи иттилои масъулин, дар доираи татбиқи ин барнома беш аз 2 миллиард дарахт шинонида мешавад ва ҳадафи асосӣ табдил додани Тоҷикистон ба «кишвари сабз» мебошад. Барнома ба афзоиши майдони сабзазор, барқарорсозии ҷангалзор, истифодаи оқилонаи захираҳои табиӣ, ҳифзи гуногунии биологӣ ва коҳиши таъсири чангу ғубор, биёбоншавӣ, таназзули хок ва тағйирёбии иқлим равона шудааст.