Дар Хадамоти гумруки Тоҷикистон Рӯзи забони давлатӣ таҷлил гардид

Душанбе, 05.10.2026 /АМИТ «Ховар»/. Дар Хадамоти гумруки назди Ҳукумати Ҷумҳурии Тоҷикистон ба муносибати Рӯзи забони давлатии Ҷумҳурии Тоҷикистон маҷлиси тантанавӣ баргузор гардид. Дар он забони тоҷикӣ ҳамчун яке аз рукнҳои асосии давлатдории миллӣ ва омили муҳими таҳкими ваҳдати миллӣ ва рушди ҷомеа арзёбӣ шуд.

Ба иттилои манбаъ, роҳбарияти Хадамоти гумрук нақши забонро дар ташаккули худшиносии миллӣ, ҳифзи таъриху фарҳанг ва идомаи суннатҳои маънавии халқ муҳим номид. Таъкид шуд, ки дар шароити ҷаҳонишавӣ ҳифз ва рушди забони давлатӣ, риояи меъёрҳои забони адабӣ ва истифодаи дурусти он аҳамияти хос дорад.

Ҳамчунин гуфта шуд, ки ҳифзу гиромидошти забони давлатӣ вазифаи ҳар шаҳрванди кишвар буда, кормандони мақомоти ҳифзи ҳуқуқ, аз ҷумла мақомоти гумрук, бояд фарҳанги баланди сухан ва эҳтиром ба арзишҳои миллӣ нишон диҳанд.