Дар ноҳияи Абдураҳмони Ҷомӣ тадбирҳои созандагӣ ва ободонӣ амалӣ гардонида мешаванд

ДУШАНБЕ, 20.09.2026 /АМИТ «Ховар»/. Дар ноҳияи Абдураҳмони Ҷомӣ бинои нави муассисаи томактабӣ ва таълимӣ ба истифода дода шуд. Тавре аз хадамоти матбуоти Раиси вилояти Хатлон хабар доданд, таъсиси муассисаҳои томактабии нав ва фарогирии бештари кӯдакон ба таълиму тарбия аз ҳадафҳои Ҳукумати мамлакат мебошад.

Дар деҳаи Зарнисори ноҳия муассисаи нави томактабӣ бо ташаббус ва саҳми сокинони маҳал барои 60 кӯдак бунёд ва навсозӣ гардид. Ҳамчунин дар деҳаи Шарифобод маркази барвақтии инкишофи кӯдак бо ду синфхона ва барои 48 кӯдак, дар назди Муассисаи таҳсилоти миёнаи умумии №60, бо дастгирии Вазорати молияи Ҷумҳурии Тоҷикистон сохта шуд.

Дар деҳаи Пушкини ҷамоати деҳоти ноҳия бинои иловагӣ назди Муассисаи таҳсилоти миёнаи умумии №28 ба истифода дода шуд ва санги асос барои бунёди муассисаи томактабӣ барои 100 кӯдак ва майдончаи варзишӣ гузошта шуд. Инчунин корҳои таъмиру мумфаршкунии роҳи деҳаи Зафаробод ба масофаи 4 километр идома доранд ва дар деҳаи Шаҳристони ҷамоати деҳоти Вахшон бинои нави бунгоҳи тиббӣ бо харҷи 400 ҳазор сомонӣ ба истифода дода шуд.