Душанбе бори дуюм мизбони Ҷоми ҷаҳон оид ба самбо мешавад

Ба гузориши АМИТ «Ховар», Ҷоми ҷаҳон оид ба самбо 19-20 сентябри 2026 дар шаҳри Душанбе баргузор мешавад. Дар ин мусобиқа беҳтарин самбочиёни ҷаҳон дар се самт — самбои варзишӣ, самбои размӣ ва самбо барои нобиноён (SVI1) барои медалҳо мубориза мебаранд.

Манбаъ хотиррасон мекунад, ки Душанбе соли 2025 низ мизбони Ҷоми ҷаҳон оид ба самбо буд. Он мусобиқа дар Маҷмааи варзишии Донишгоҳи миллии Тоҷикистон баргузор шуда, варзишгарон дар 14 вазн байни мардону занон рақобат карданд. Дар Ҷоми ҷаҳон оид ба самбои 2025 самбочиёни Тоҷикистон, Қазоқистон, Қирғизистон, Туркманистон, Узбекистон, Русия, Беларус, Булғористон ва Маҷористон иштирок доштанд.

Ба навиштаи хабар, Ҷоми ҷаҳон оид ба самбо яке аз мусобиқаҳои муҳими тақвими байналмилалии ин ришта ба ҳисоб меравад ва варзишгарони тоҷик дар мусобиқаи соли 2025 9 медал ба даст оварданд.