Байни Хадамоти алоқа ва «Хуавей технологии Тоҷикистон» ёддошти тафоҳум оид ба рушди технологияҳои 5G-A ва 6G ба имзо расид

Тибқи хабар, санад бо ҳадафи ба роҳ мондани ҳамкории шарикии стратегӣ ва ҳамоҳангсозии талошҳои ҷонибҳо барои таҳқиқ, озмоиш ва ҷорӣ намудани технологияҳои 5G-A ва 6G дар қисми болоии диапазони басомадҳои 6 ГГс, аз 6.425 то 7.125 ГГс, ба имзо расид. Масъулини Хадамоти алоқа гуфтаанд, ки ин санад ба татбиқи «Стратегияи рушди соҳаи алоқаи Ҷумҳурии Тоҷикистон барои давраи то соли 2040» ва нақшаи чорабиниҳои он барои солҳои 2026-2030 мусоидат мекунад. Дар хабар таъкид мешавад, ки технологияҳои 5G ва 6G аз самтҳои муҳими рушди инфрасохтори рақамӣ мебошанд ва истифодаи онҳо метавонад ба баланд бардоштани самаранокии фаъолияти иқтисодӣ, беҳтар шудани сифати хизматрасонӣ ва густариши имкониятҳои инноватсионӣ мусоидат намояд.