Пешвои миллат: «Бе донистани забони адабии тоҷикӣ омӯхтани забонҳои хориҷӣ номумкин аст»

Душанбе, 05.10.2026. Пешвои миллат Эмомалӣ Раҳмон ба муносибати Рӯзи забони давлатии Ҷумҳурии Тоҷикистон паёми шодбошӣ пешниҳод карданд. Ӯ гуфт, ки мақоми иҷтимоии забон, зарурати донистани он дар сатҳи аъло ва эҳтирому бузургдошти забони модарӣ бояд аз зинаҳои аввали таълиму тарбия миёни кӯдакон, наврасон ва ҷавонон бештар тарғиб шавад.

Президент изҳор дошт, ки насли наврас ва ҷавонон бояд дарк кунанд: бе донистани забони адабии тоҷикӣ ва риояи қоидаҳои маъноиву дастурии он омӯхтан ва азхуд намудани забонҳои хориҷӣ бисёр мушкил ва ҳатто номумкин аст. Ба гуфтаи ӯ, забон на танҳо воситаи ибрози андеша, балки падидаи нодири иҷтимоиест, ки таърих, тамаддун, фарҳанг, маънавиёт ва ҳисси баланди худшиносиву ватандӯстӣ дар он нуҳуфтааст.

Ӯ ҳамчунин таъкид намуд, ки вазифаи ҷонии соҳибони аслии забон аст, ки бо ҳисси баланди ифтихори миллӣ аз он пуштибонӣ кунанд, истифодаи дурусту меъёрии онро дар ҳамаи зинаҳои фаъолият таъмин созанд ва забони зебову шевои тоҷикии форсиро дар сатҳи ҷаҳонӣ ба таври арзанда муаррифӣ намоянд.