Дар Душанбе нахустин Анҷумани саратоншиносон ва радиологҳои Тоҷикистон доир шуд

16 октябри 2026 дар шаҳри Душанбе нахустин Анҷумани саратоншиносон ва радиологҳои Ҷумҳурии Тоҷикистон дар мавзуи «Саратоншиносӣ ва радиологияи муосир: ташхиси барвақт, тибби дақиқ, радиотерапияи пешрафта ва ҳамгироии илм ба амалияи миллии тандурустӣ» баргузор гардид.

Дилрабо Мансурӣ, муовини Сарвазири Ҷумҳурии Тоҷикистон, гуфт, ки Ҳукумат ба рушди низоми миллии тандурустӣ, тақвияти хадамоти саратоншиносӣ, ҷорӣ намудани технологияҳои муосири тиббӣ ва баланд бардоштани дастрасии аҳолӣ ба хизматрасониҳои махсусгардонидашуда аҳамияти хос медиҳад. Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон, таъкид кард, ки пешгирӣ, ташхиси барвақт ва истифодаи усулҳои муосири табобат барои коҳиш додани оқибатҳои бемориҳои саратонӣ муҳим мебошанд.

Тибқи иттилоъ, ҳаҷми маблағгузории хадамоти саратоншиносӣ дар 5 соли охир аз 22.8 миллион сомонӣ ба 56.9 миллион сомонӣ расидааст ва маблағгузорӣ барои хариди доруҳои химиотерапевтӣ аз 1.2 миллион сомонӣ ба 9.6 миллион сомонӣ афзоиш ёфтааст. Ҳамчунин, дар соли 2026 байни Маркази миллии тиббӣ-тадқиқотии гематология, онкология ва иммунологияи кӯдакона ба номи Дмитрий Рогачёв ва Маркази ҷумҳуриявии илмии саратоншиносии Тоҷикистон ёддошти тафоҳум ба имзо расид.