Қарори Раиси шаҳри Душанбе оид ба омодагӣ ва таҷлили Рӯзи Конститутсияи Ҷумҳурии Тоҷикистон ба тасвиб расид

ДУШАНБЕ, 2026-10-08 /АМИТ «Ховар»/. Қарори Раиси шаҳри Душанбе оид ба омодагӣ ва таҷлили Рӯзи Конститутсияи Ҷумҳурии Тоҷикистон ба тасвиб расид. Дар доираи он нақшаи чорабиниҳои Мақомоти иҷроияи ҳокимияти давлатии шаҳри Душанбе тасдиқ гардид.

Тибқи ин қарор, бо мақсади дар сатҳи баланд таҷлил намудани Рӯзи Конститутсияи Ҷумҳурии Тоҷикистон дар тамоми муассисаву ташкилоти Мақомоти иҷроияи ҳокимияти давлатии шаҳри Душанбе ва зерсохторҳои он мулоқоту суҳбат ва барномаҳои фарҳангию фароғатӣ бо иштироки коршиносони соҳа баргузор мегарданд.

Ёдовар мешавем, ки 32 сол муқаддам, 6 ноябри соли 1994, халқи тоҷик дар таърихи беш аз ҳазорсолаи давлатдориаш бори аввал Конститутсияи Ҷумҳурии Тоҷикистонро бо роҳи раъйпурсии умумихалқӣ қабул намуд. Ин санад ҳамчун Қонуни асосӣ заминаҳои ҳуқуқии давлат, дахлнопазирӣ ва якпорчагии мамлакат, манфиатҳои миллӣ ва асосҳои сиёсиву ҳуқуқӣ, иқтисодиву иҷтимоии ҷомеаро муайян намуд.