Дар 9 моҳ машғулиятҳои кӯтоҳмуддати касбомӯзиро 6597 нафар хатм намуданд

Ба иттилои АМИТ «Ховар» аз 2026-10-27, дар 9 моҳи соли ҷорӣ 6597 нафар машғулиятҳои кӯтоҳмуддати касбомӯзии назди муассисаҳои таълимии таҳсилоти ибтидоии касбиро хатм намуданд. Аз ин шумора 2476 нафар ба муассисаҳои таълимии вилояти Суғд, 1132 нафар ба вилояти Хатлон, 68 нафар ба Вилояти Мухтори Кӯҳистони Бадахшон, 1826 нафар ба шаҳру ноҳияҳои тобеи ҷумҳурӣ ва 1095 нафар ба шаҳри Душанбе рост меояд.

Ҳамчунин, дар заминаи Литсейи касбии техникии ноҳияи Шуғнон, Литсейи касбии техникии шаҳри Бохтар, Литсейи алоқаи шаҳри Душанбе ва Литсейи касбии техникии нақлиёти автомобилии шаҳри Душанбе марказҳои шуғли фосилавӣ фаъолият доранд ва шаҳрвандонро ба касбомӯзӣ ҷалб мекунанд. Дар ин марказҳо дар 9 моҳ 1300 нафар машғулиятҳои кӯтоҳмуддатро хатм намуда, ҳоло 121 нафар дигар низ ба касбомӯзӣ фаро гирифта шудаанд.

Илова бар ин, дар муассисаҳои таълимии ғайридавлатӣ, ки машғулиятҳои кӯтоҳмуддат баргузор мекунанд, 5500 нафар шунаванда соҳибкасб гардидаанд ва 206 нафар ҳоло таҳсилро идома медиҳанд. Дар маҷмӯъ, дар 9 моҳи соли 2026 13397 нафар ба касбомӯзӣ ва 1401 нафар ба идомаи таҳсил дар ин самт фаро гирифта шудаанд.