Ҳайати Тоҷикистон дар ҷаласаи 76-уми Кумитаи минтақавии аврупоии Созмони ҷаҳонии тандурустӣ иштирок намуд

Дар шаҳри Копенгагени Дания ҷаласаи 76-уми Кумитаи минтақавии аврупоии Созмони ҷаҳонии тандурустӣ бо иштироки намояндагони 53 давлат баргузор гардид. Тибқи иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Кумитаи минтақавӣ мақоми олии қабули қарорҳо дар Минтақаи Аврупо ба ҳисоб меравад.

Дар ҷаласа масъалаҳои идоракунӣ, сифати нигоҳубин ва бехатарии беморон, зеҳни сунъӣ ва иқтисодиёти тандурустӣ, пешгирӣ ва мубориза бо бемориҳои ғайрисироятӣ, таҳкими мусоидат ба солимӣ ва пешгирии бемориҳо, инчунин таҳияи стратегияи нави минтақавӣ оид ба солимии равонӣ баррасӣ шуд. Ҳамчунин стратегияи нави минтақавӣ оид ба пиршавии солим таҳти унвони «Пиршавӣ ин зиндагӣ аст: стратегияи мусоидат ба тамоми давраи ҳаёт барои солимӣ ва некуаҳволӣ дар минтақаи аврупоии Созмони ҷаҳонии тандурустӣ барои солҳои 2026-2030» пешниҳод гардид.

Дар хабар гуфта мешавад, ки нишондиҳандаи дарозумрӣ дар Тоҷикистон аз 70 ба 77 сол расидааст. Таъкид шудааст, ки ҳукумати Тоҷикистон барои беҳтар намудани хизматрасонии тиббӣ ба аҳолӣ тадбирҳо меандешад ва ҳоло «Стратегияи ҳифзи солимии аҳолии Ҷумҳурии Тоҷикистон барои давраи то соли 2030» амал мекунад.