Форуми дувоздаҳуми миллӣ оид ба волоияти қонун дар Тоҷикистон баргузор шуд

Дар шаҳри Душанбе ба муносибати Рӯзи Конститутсия бо ташаббуси Вазорати адлияи Ҷумҳурии Тоҷикистон Форуми дувоздаҳуми миллӣ оид ба волоияти қонун баргузор шуд. Дар кори форум намояндагони Дастгоҳи иҷроияи Президенти Ҷумҳурии Тоҷикистон, Маҷлиси миллӣ ва Маҷлиси намояндагон, роҳбарияти Вазорати адлия, Суди конститутсионӣ, Суди Олӣ, Суди олии иқтисодӣ, инчунин роҳбарон ва кормандони вазорату идораҳои дахлдор, ҳуқуқшиносон, ҷомеаи шаҳрвандӣ ва ташкилотҳои байналмилалӣ иштирок карданд.

Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Анвар Сафарзода гуфт, ки баргузор шудани ин форум бори аввал дар бинои нави Вазорати адлия барои иштирокдорон ифтихормандист ва онро дар заминаи 35-солагии Истиқлолияти Тоҷикистон рӯйдоди муҳим номид. Вазири адлия Музаффар Ашуриён таъкид кард, ки Конститутсия барои ташаккул ва рушди низоми ҳуқуқӣ, таҳкими сиёсати ҳуқуқӣ ва пешбурди қонунгузорӣ замина мегузорад.

Тибқи иттилоъ, Форуми миллӣ оид ба волоияти қонун аз соли 2015 ҳар сол баргузор мешавад. Дар анҷоми нишаст тавсияҳо қабул шуда, барои баррасӣ ва корбарӣ ба мақомоти дахлдор ирсол гардиданд.