PISA 2025 бори аввал ба Тоҷикистон маълумоти байналмилалӣ муқоисашаванда оид ба сатҳи донишу малакаи хонандагони 15-сола дод

Вазорати маориф ва илми Ҷумҳурии Тоҷикистон ва Маркази миллии тестӣ назди Президенти Ҷумҳурии Тоҷикистон 15 сентябр натиҷаҳои аввалин иштироки Тоҷикистон дар PISA 2025, барномаи байналмилалии Созмони ҳамкории иқтисодӣ ва рушд барои арзёбии дастовардҳои таҳсилоти хонандагонро пешниҳод карданд. Дар ин бора хадамоти матбуоти вазорат хабар дод.

Таҳқиқоти PISA 2025 дар шакли коғазӣ миёни хонандагони 15-солаи шаҳри Душанбе гузаронида шуда, се самти асосиро фаро гирифт: саводнокии табиӣ-илмӣ, математикӣ ва хониш. Дар санҷиш 5 771 хонанда аз 160 муассисаи таълимии интихобшуда иштирок кард.

Таъкид мешавад, ки чун таҳқиқот танҳо дар Душанбе гузаронида шудааст, натиҷаҳо танҳо вазъиятро дар пойтахт инъикос мекунанд ва онҳоро ба тамоми низоми маорифи Тоҷикистон татбиқ кардан мумкин нест.