Муаррифии 6 лоиҳаи нави истеҳсолӣ, логистикӣ ва иҷтимоӣ дар шаҳри Душанбе

Дар маҳаллаи Арбобхотуни ноҳияи Сино сохтмони маҷмааи муосири логистикӣ ва истеҳсолии ҶДММ «Ёвар» оғоз шуд. Лоиҳа таъсиси маркази истеҳсоли маҳсулоти хӯрокворӣ ва иншооти коркарду бастабандии меваю сабзавотро дар бар мегирад ва баъди татбиқи пурра 930 ҷойи кори доимӣ фароҳам меорад.

Ҳамчунин, ба сохтмони корхонаи нави истеҳсоли техникаи маишии ҶДММ «Артел Авесто Электроникс» санги асос гузошта шуд. Иқтидори истеҳсолии корхона беш аз 500 ҳазор техникаи маишӣ дар як сол буда, таъсиси 400 ҷойи корӣ пешбинӣ шудааст. Дар ҳамин маҳалла лоиҳаи корхонаи истеҳсолии ҶДММ «Хонаи ман» низ муаррифӣ гардид, ки метавонад дар як сол 10 ҳазор миз, 5 ҳазор рахти хоб, 4 ҳазор ҷевон, 4 ҳазор курсии гуногун ва 5 ҳазор таҷҳизоти тиббиро истеҳсол кунад ва 60 ҷойи кори доимӣ фароҳам оварад.

Илова бар ин, сохтмони Маркази агрологистикӣ оғоз ёфт, ки барои қабул, нигоҳдорӣ, коркард ва бастабандии маҳсулоти кишоварзӣ пешбинӣ шудааст. Иқтидори он нигоҳдории ҳамзамони то 2 ҳазор тонна маҳсулот мебошад ва ба коҳиш додани талафоти маҳсулоти кишоварзӣ, дастгирии кишоварзон ва густариши имкониятҳои содиротӣ мусоидат мекунад. Лоиҳаи сардхонаи ҶДММ «Мармарӣ» бо ғунҷоиши 2 ҳазор тонна низ муаррифӣ шуд; бо ба истифода додани он 240 ҷойи кори доимӣ таъсис меёбад. Ба гуфтаи масъулон, дар маҷмӯъ дар доираи ҳафт лоиҳаи муаррифишуда таъсиси зиёда аз 3 ҳазор ҷойи корӣ пешбинӣ шудааст.