Масоили табодули таҷриба ва омӯзиши мутахассисони тоҷик дар озмоишгоҳҳои Институти байтории Италия баррасӣ гардид

ДУШАНБЕ, 25.09.2026 /АМИТ «Ховар»/. Дар Ҷумҳурии Италия зимни вохӯрии Раиси Кумитаи бехатарии озуқавории назди Ҳукумати Ҷумҳурии Тоҷикистон Муҳаммадсаид Файзуллозода бо роҳбарияти Институти байтории Италия масъалаи идомаи ҳамкории техникӣ баррасӣ гардид.

Дар мулоқот масъалаҳои табодули таҷриба ва омӯзиши мутахассисони Ҷумҳурии Тоҷикистон дар лабораторияҳои институт мавриди муҳокима қарор гирифтанд. Таъкид шуд, ки ташкили чунин омӯзишҳо барои таҳкими иқтидори ташхисии лабораторияҳои Тоҷикистон ва татбиқи талаботи байналмилалӣ аҳаммияти муҳим дорад.

Ҳамчунин масъалаи аккредитатсияи байналмилалии лабораторияҳои Ҷумҳурии Тоҷикистон, аз ҷумла мутобиқ кардани низоми идоракунии сифат, ҳуҷҷатгузорӣ, баланд бардоштани салоҳияти кормандон ва гузаронидани санҷишҳои лабораторӣ баррасӣ гардид.