ОМОДАГӢ БА ЗИМИСТОН: муассисаҳои тандурустии шаҳри Хуҷанд барои фасли сармо омода мешаванд

Душанбе, 2026-10-14 /АМИТ «Ховар»/. Роҳбарияти вилояти Суғд дар шаҳри Хуҷанд бо фаъолияти Беморхонаи шаҳрии рақами 2, Беморхонаи клиникавии шаҳрии рақами 1 ва таваллудхонаҳои шаҳрӣ ва вилоятӣ барои давраи тирамоҳу зимистони солҳои 2026-2027 шинос шуд.

Зимни боздид ҳолати омодагии муассисаҳои тиббӣ ба фасли сармо мавриди таваҷҷуҳ қарор гирифт. Тибқи иттилоъ, ин муассисаҳо бо ангишт, ҳезум ва дигар маводи зарурии сӯхт таъмин буда, аз низоми муосири гармидиҳӣ истифода мекунанд.

Ҳамчунин, барои беҳтар намудани имкониятҳои ташхису табобат биноҳо ва иншооти нав сохта шуда, таҷҳизоти муосири тиббӣ дастрас гардидааст. Раиси вилоят ба масъулин дастур дод, ки омодагии муассисаҳои тандурустиро ба зимистон ҳамаҷониба таъмин намоянд ва ба баланд бардоштани сифати хизматрасонии тиббӣ, беҳтар кардани шароити беморон ва ҳифзи саломатии модару кӯдак диққати махсус диҳанд.